السلام علیکم ورحمۃ اللہ وبرکاتہ

میں ایک رفاہی ادارے کے ساتھ کام کرتی ہوں جو "مین" کی ریاست میں مسلمان پناہ گزینوں کی سکونت اور دیگر امداد وغیرہ کا کام کرتی ہے۔ یہ ادارہ مہاجرین اور پناہ گزینوں کے لئے ایسے مواقع فراہم کرنے کی کوشش کرتا ہے جن کے ذریعے وہ خودکفیل بن سکیں ، اس سلسلے میں ان لوگوں کے روابط ایسے اداروں سے قائم کئے جاتے ہیں جو اہم امداد مثلا محدود کرائے والے گھر، حکومتی میڈیکل امداد وغیرہ کی فراہمی میں مدد کرتے ہیں۔ا س سلسلے میں مزید ایک سروس جو ان لوگوں کو فراہم کی جاتی ہے وہ " میچڈ سیونگز اکاؤنٹ " ہے ، جو "نیو وینچرز مین "نامی کمپنی فراہم کرتی ہے۔یہ کمپنی بھی ایک ایسی ہی کمپنی ہے جو مین کی ریاست کے باشندوں اور ان کے گھر والوں کو بدلتی ہوئی معیشت اور معاشی حالات میں معاشی تحفظ فراہم کرتی ہے۔ چونکہ سیونگز اکاؤنٹس سود ی نظام کے تحت جمع شدہ پیسے پر سود کو جنم دیتے ہیں، ہمارے علم کے مطابق وہ حرام اور ناجائز ہیں ایسے ہی میچڈ اکاؤنٹس "فکسڈ" ہوتے ہیں ، جو مسلمان پناہ گزینوں کے لئے کافی تشویش کا باعث ہے۔ اس سلسلے میں ہم آپ سے فتوی چاہتے ہیں کہ میچڈ سیونگز اکاؤنٹس جائز ہیں ، خصوصا ان پناہ گزینوں کے لئے۔

جن میچڈ سیونگز اکاؤنٹس کا ذکر ہے ان کا نام "فیملی ڈویلپمنٹ اکاؤنٹ (ایف ڈی اے)"اور "رینی ڈے سیونگز اکاؤنٹ "ہے۔

وفاقی حکومت کی جانب سے ایف ڈی اے پروگرام کے تحت   دئیے جانے والے فائدے کی تفصیل یہ ہے کہ ایسے حضرات جن کی تنخواہ وفاقی شرح غربت سے دو سو فی صد نیچے ہے، اور جو گھر خریدنے، تعلیم حاصل کرنے، چھوٹا موٹا کاروبار شروع کرنے کے لئے پیسے جمع کرنا چاہتے ہیں، تو ان کے اس اکاؤنٹ میں ہر ایک جمع کردہ ڈالر(اور زیادہ سے زیادہ ایک ہزار ڈالر تک)   کے عوض حکومت چار ڈالر پبلک فنڈنگ اور نجی ڈونیشنز کے ذریعے شامل کر دیتی ہے۔ یہ پروگرام لوگوں کی اس سلسلے میں بھی راہنمائی کرتا ہے کہ پیسوں کو کیسے جمع کیا جائے ، بہتر طور پر جمع اور خرچ کا نظام بنایا جائے، بہتر کریڈٹ کیسے بنایا جائے اور اپنے اہداف کو کیسے حاصل کیا جائے۔

رینی ڈے سیونگز اکاؤنٹس (آر ایس ڈی اے ) کے تحت دیئے جانے والے میچڈ سیونگز اکاؤنٹس ایسے لوگوں کو دئیے جاتے ہیں جو خاص تنخواہ سے کم پیسے کماتے ہوں، اور ایمرجنسی حالات کے لئے پیسے جمع کرنا چاہتے ہوں ۔ اس اکاؤنٹ کی تفصیل کے تحت بندے کے جمع کردہ ہر ڈالر کے لئے (اور زیادہ سے زیادہ تین سو ڈالر تک )، نجی ڈونرز سے تین ڈالر اس میں شامل کر دیتے ہیں۔ اس سلسلے میں اگر آپ مزید کوئی چیز پڑھنا چاہتے ہوں تو نیو وینچرز مین کی ویب سائٹ کے مندرجہ ذیل لنک سے پڑھ سکتے ہیں:

http://newventuresmaine.org/programs/manage-your-money/

نیو وینچرز مین کی جانب سے مسلمانوں کی تشویش کو دور کرنے کے لئے مسلمان پناہ گزینوں کے لئے   غیر سودی سیونگز اکاؤنٹس بھی جاری کئے گئے ہیں ، جس کے ساتھ ساتھ میچڈ فنڈ بینک میں جمع نہ کرنا بھی شامل ہے۔ انھوں نے اس پروگرام کی ترتیب تحائف کی صورت میں کر دی ہے جس میں مثال کے طور پر اگر ایک شخص نے ایک ہزار ڈالر جمع کئے ہیں جس سے وہ گاڑی خریدنا چاہتا ہے تو یہ لوگ تین ہزار ڈالر اس گاڑی کی خرید کے لئے براہ راست گاڑی بیچنے والے ڈیلر کے اکاؤنٹ میں ڈال دیتے ہیں۔

اوپر فراہم کردہ تفصیلات کے مطابق، یعنی کون ان پروگرامز کو فنڈ کرتا ہے، اس میں کون کون فائدہ اٹھا سکتا ہے ، اور اس میں شامل ہونے کے لئے تنخواہ کی خاص مقدار ہونا وغیرہ، کی روشنی میں کیا یہ اکاؤنٹس شریعت کی رو سے جائز ہیں؟ ہمارا اصل مسئلہ ان پروگرامز سے متعلق یہ ہے کہ جو مال لوگوں کو دیا جا رہا ہے وہ ایک مختص شدہ یا فکسڈ حساب سے دیا جا رہا ہے اور جو مال لوگ اس پروگرام کے تحت کما رہے ہیں اس میں ذاتی جدوجہد نہ ہونے کی وجہ سے اس پر سود کا شائبہ ہوتا ہے، اور جس کی وجہ سے اس کو ناجائز قرار دیا جا سکتا ہے۔ آپ کی اس سلسلے میں راہنمائی ان مہاجرین اور پنا ہ گزینوں کے لئے بہت کارآمد ہو گی۔جزاکم اللہ خیرا۔