السلام علیکم ورحمۃ اللہ

میری کہانی کچھ لمبی ہے، مگر میں امید کرتا ہوں کہ آپ میری رہنمائی فرمائیں گے۔

افسوس کے ساتھ یہ کہتا ہوں کہ میں ایک غیر مسلم لڑکی کے ساتھ کچھ برسوں سے مراسم رکھتا ہوں۔ جب میں اس سے ملا تھا تو میں اس وقت ایک باعمل مسلمان نہ تھا، لیکن مجھے اب اس بات کا علم ہے کہ جو میں نے کیا وہ غلط ہے۔ پچھلے ۴/۵ مہینوں سے ہمارا تعلق ختم ہوگیا ہے، کیونکہ اس کے والدین کی طرف سے کچھ سختی ہوئی ہے۔ اس دوران اس نے مجھ سے رابطہ نہیں کیا، میں نے اللہ پاک سے یہ دعا کی کہ وہ میری زندگی میں کبھی نہ لوٹے اگر وہ اسلام قبول نہیں کرتی تو۔ لیکن اس کے چند ہفتوں کے بعد اس نے مجھے پھر کال کی، میری رائے میں یہ ایک بے نفع و نقصان کال تھی۔ میں پھر بھی اللہ تعالی سے وہی دعا کرتا رہا۔ مجھے علم نہیں کہ ایسی دعا کا کیا جانا جائز ہے یا نہیں۔

اس کے بعد ہمارا کوئی رابطہ نہ ہوا البتہ میں نے اسے ایک خط بھیج کر اسے اسلام قبول کرنے کی دعوت دی، اور اس کو ہمارے مستقبل میں ساتھ چلنے کے لئے شرط قرار دیا۔ ۴/۵ روز بعد اس نے مجھ سے رابطہ کیا اور ہم لوگوں نے یہ طے کیا کہ ہم دو ہفتوں کے بعد ملاقات کریں گے۔ لیکن اس کے بعد پھر وہ غائب ہو گئی، حالانکہ وہ اکھڑ لڑکی نہیں ہے اور نہ ہمارے درمیان کوئی لڑائی وغیرہ ہوئی تھی۔

وہ ایک ایسی لڑکی ہے جو گھر میں رہنا پسند کرتی ہے اور ان تمام خرافات میں نہیں پڑتی جن میں یورپ کی خواتین عام طور پر ملوث رہتی ہیں (مثلا شراب نوشی، کلبزوغیرہ میں ناچ گانے کے لئے جانا)۔ وہ فطری طور پر مان کر چلنے والی بھی ہے اور مجھ پر زور دیتی تھی کہ فیصلے میں ہی کروں۔ جس سے مجھے یہ معلوم ہوتا تھا کہ وہ ایک اکھڑ لڑکی نہیں۔ مجھے اس بات کا بھی دکھ ہے کہ ہم اسلام کے بارے میں ابھی کچھ صحیح سے بات بھی نہیں کر سکے تھے۔ میں نے ماضی میں اللہ تعالی سے یہ دعا بھی کی تھی کہ مجھے کوئی ایسی نشانی دکھا دیں جس سے مجھے یہ علم ہو جائے کہ وہ دین اسلام کو قبول کرنا چاہتی ہے یا نہیں، لیکن یا تو مجھے ایسی کوئی نشانی نہیں دی گئی یا پھر میرے دیکھنے میں غلطی ہو گئی۔

میرا سوال یہ ہے کہ کیا اب مجھے اس سے رابطہ کر کے بات کرنی چاہئے یا نہیں؟ میں اس پوری صورتحال سے بہت پریشان ہوں اور میں کسی اور کی رائے اس بارے میں معلوم کرنا چاہتا ہوں کہ مجھے کیا کرنا چاہئے۔ میں خود سے اپنے اس سوال کا جواب نہیں دے پا رہا ہوں۔ میں یہ نہیں چاہتا کہ میں اس کو کال کروں اور پھر وہ مجھے مستقل جواب نہ دے۔

جو جواب بھی آپ مجھے دیں گے میں اس کو بخوشی قبول کروں گا اور انشاءاللہ اس پر دل سے عمل بھی کروں گا۔ جزاک اللہ خیرا ۔